Henendroour eo an Euskarad yaouank 25 blez, a oa daet da chom da Vreizh nend eus ket pell zo. Displegiñ a ra emañ é « studiiñ fosiloù evit kompren penaos en doa cheñchet an arvor a-gaoz d’an hin ha da obererezhioù mab-den ». Evit e dezenn e labour Vincent àr ar mikrobezhin fosilaet. « Dynamique et évolution des efflorescences algales toxiques : signature temporelle à partir des sédiments littoraux bretons » eo titl e dezenn. « Me ivez am bez poan da zelc’her soñj ag hec’h anv » emezañ en ur vousc’hoarzhin. Berr-ha-berr e klask get e dezenn gouiet « a-gaoz da betra e oa lieskementet ar mikrobezhin pistrius… dre studiiñ an 200 vlez tremenet pe muioc’h, evit bout prest pa arruo mem tra en-dro en amzer da zonet ». Da gentañ e tele ar c’hlaskour yaouank kavout merkoù ha titouroù. Evit e labour e vo tennet karotezennoù gouelezennek ha tammoù àr-c’horre, er Mor Bihan hag e stêr Pennerv… Lod anezhe a vo stoket ha naetaet e labourva Ostreapolis, a zo miret evit ar skianterion. E-giz-se e c’hello Vincent labourat evel ma kar. « A-bad 3 blez e labourin kalz get ar mikroskop » emezañ. Àr ar mikrobezhin fosilaet en doa labouret dija a-bad e Vaster 2 e Bourdel. Evit adsevel an traoù em harpo ar skiantour àr teknikoù an henekologiezh, àr an douargimiezh hag àr ar ouelezennouriezh… « Labourat diàr meur a ziskiblezh, setu ar pezh a gavan mat er geoskiantoù » eme Vincent. Nend eo nemet penn-kentañ e enklask.